作者有话要说：名词解释：Dr.Hung=洪美雪Dr.g=张一健Dr.Lau=刘炳灿　　【Dr.Hung有嘢讲】　　　　今日Dr.Hung排休，咁啱妇产科嗰边打电话来提醒预约时间到，咪过去做个常规检查。点知碰到一个病人家属，啊，也包括病人，咪之前嗰单主题公园爆炸案里整亲脑嗰个俞sir同佢太太咯。做手术嗰时自己仲唔觉，后尾姐夫Dr.g都讲嗰个俞sir同洋葱有小小似，到佢伤口拆咗纱布绷带自己先发觉确实如此，好似佢比洋葱大只啲黑啲了。讲起嗰单案Dr.Hung仲有小小惊，唔係因为手术，係因为原本嗰日佢都要带个女过去主题公园玩翻转，点知Dr.Lau前一晚饮到啤啤呼，一点几先俾洋葱同吕姑娘抬回屋企，第二日自然是瞓到日上三竿，唔使讲应承个女出去玩，连lunch都冇食。嗰时Dr.Hung係好嬲Dr.Lau，边有人大年初一出去劈酒嘅啊，但收到医院call返去先知发生咁大件事，后尾惗返佢都庆幸嗰日佢哋冇去到。　　嗰个阿sir送嚟医院嗰时一头都係血了，照过CT片发现有炸弹碎片喺脑入面，佢太太仲话佢之前做嘢都係遇到过爆炸案，视觉神经受损失明过一排，其实咁样係好麻烦嘅喈，call咗眼科嚟会诊，后尾姐夫主刀，Dr.Hung协助，做咗六个几钟手术跟住送佢入ICU。夜晚查房时又碰到佢太太，着身病号服揸住杯牛奶一路都唔饮，喺ICU度坐住，眼定定望住嗰个阿sir。都係做人哋mummy嘅，Dr.Hung睇佢陀住个肚，都唔忍心，劝多佢两句，话唔理病人乜情况，自己都要保重自己先得嘅。佢就话，俞sir係为护住佢哋个女先搞成咁，宜家个女係冇事，但佢好惊老公挨唔到呢关。Dr.Hung惗，做得人daddy嘅，梗係要护住细嘅了，好似自己屋企琴晚大醉嗰只，上次同自己嘅女喺出边，嗰女挂住讲电话都冇留心睇路，都係自己老公揽住佢先冇俾车撞亲，不过自己老公就整亲只手，吊咗成个月绷带，仲要俾洋葱笑，话乜医者不自医。　　做完手术第二日自己朝头早查房，有成班人嚟探嗰个俞sir，都係高高大大嘅中年男人，但ICU唔俾得咁多人入去，佢哋咪问自己阿sir嘅情况，跟住佢太太都嚟埋。佢仲係着住病号服，梗係需要留院观察了，睇佢个肚冇六个月都有五个月了，其实係应该唞多阵嘅，不过自己能讲嘅都讲咗，又唔係自己嘅病人，睇佢嘅样仲係撑得住了。跟住嗰班男人有的嗌佢阿嫂，有的嗌佢madam，Dr.Hung先知佢太太原来都係当差嘅。同佢哋解释过阿sir嘅情况，对佢太太笑笑，自己跟住去查下一个病人了。　　佢太太好似喺医院住咗冇几耐，后尾朝早查房就无再遇到佢着住病号服了，净係遇到阿sir其他屋企人多啲咯，不过夜晚查房常常撞返佢着住便装，有时仲带住佢哋嘅女。自己咪同佢笑笑，叫佢要多注意身体咯，佢又叫个女同自己问好。个女真係生得好鬼精灵，同个madam几似样，都让自己惗返屋企嘅刘小姐，但探完阿sir个女成日都係眼湿湿鼻头红红。唉，因为自己搞到阿爸咁样，个女肯定都很唔好受了，虽然佢咁细，呢个年龄，本来应该拖住阿爸只手撒娇，大年大节搞成咁，真係等佢哋惨。　　其实俞sir一路冇醒，自己同姐夫都不由有啲担心，係咪诊断出咗差错，但复查过，会诊过，都係冇发现新嘅问题。从希波拉底到宜家，现代医学虽然已经发展得咁长远，引入咁多高科技，但讲到尾，医学都唔係万能嘅，人体嘅病症何其复杂，同时随着外部环境嘅发展，不断有新嘅变化出现，有太多都係我哋未能了解掌握嘅奥妙。就算个病人係医生自己都係一样，否则，家姐当初都唔会差啲冇得同姐夫行埋一起了。其实一开始自己都好难接受好多嘢原来我哋做唔到，遇到救唔返嘅病人心情都会唔好，但如Dr.Lau话哉，医生嘅使命係“To cure sometimes，to relieve often，to fort always（有时治愈，常常帮助，总是安慰）”了。讲起Dr.Lau，有次嚟接自己放工，遇上嗰个madam啱啱探完病，佢同自己讲嗰个madam长得有小小似自己，不过无自己靓，真係顶唔顺佢把口，咪叫佢唔好摞嗰个madam讲笑，人哋都咁阴功了。讲起又讲，成日嚟探俞sir嘅嗰班阿sir入面，有一个又真係有啲似Dr.Lau。　　后尾好几次喺lift撞到madam，有时都唔係探病时间，有时唔赶时间咪同佢倾下，佢话嚟做产检，肚里嘅BB都係女仔嚟架。其实自己都好中意女仔，不过得返一件已经够了，话嗮自己同Dr.Lau都无乜时间凑女喈，好彩mummy同daddy不时帮下手，否则真係要踢嗮脚了。　　今日Dr.Hung係做妇科常规检查，读医又係女人，梗係觉得乜嘢都无健康紧要咯，不过好在自己身体都几掂，唔係嘅话周不时要当夜更，做亲手术要企七八个钟，一早就倒下了。原本自己喺坐低等嗌号，无留意四围环境嘅，都係俞sir叫自己，Dr.Hung先抬头，佢嗰时仲惗俞sir唔係有乜唔妥先返医院吧，不过惗下就算有手尾跟都唔至于嚟睇妇科喈，俞sir话佢係陪太太嚟做产后检查。係了，佢太太都几硬颈，俞sir昏迷咗差唔多半年，到佢生埋个bb先醒返，不过都係好人有好报喈，一家四口团聚都算happy ending啊。不过惗返之前有次自己查房，仲听到madam好恶咁嬲俞sir，话佢甩底，无陪madam入产房之类的，同俞sir未醒返前讲嘢嘅样完全唔同，睇怕都係两公婆耍花腔喈。后尾轮到自己嘅号，咪同俞sir讲声自己入去检查了，嗰时madam仲未出返嚟，俞sir同自己讲再见，自己心惗都係无谓再见了，揸正牌揸抢嘅同揸正牌揸刀嘅，真係再见都唔慌好嘢了，点知后尾居然都真係再见到啊。　　做完检查妇科嘅Dr.Ma话报告出咗会call自己嚟摞，再出诊室都无见俞sir了，睇怕都係等到太太走咗咯。睇时间都係lunch time了，咪call Dr.Lau问佢有冇时间撑抬脚，佢话仲有小小手尾要执，麻烦自己先落teen等人喔。入到teen，帮Dr.Lau嗌咗嘢食，咪端住餐盘搵枱坐咯。坐低先发现产科嘅Anita坐喺隔离枱度，自己同佢都唔係好熟，净係笑下就算。Dr.Lau未到，自己原本睇住手机上下网，但坐隔离枱又听得几清楚。Anita话乜阿强呢次真係几辛苦，阿礼你要锡佢多啲喇，我仲惗点解个名咁熟口面，跟住坐Anita对面嗰男人一出声我先发觉佢係俞sir喔，俞sir话佢不嬲都锡老婆嘅，不过今次真係多得学姐帮手，啊原来Anita係佢哋学姐嚟架，其实Anita都算医术唔错嘅，之前仲喺出边开过诊所，后尾好似合伙人移民，先入嚟慈爱做。跟住Dr.Lau就嚟咗，自己就无留意隔离枱讲咗啲乜了。佢哋走嗰阵时，自己仲睇到俞sir帮madam摞手袋，又揽住佢条腰，讲真madam身材又恢复得几好，仲靓过接俞sir出院嗰时了。Dr.Lau问自己睇乜，自己咪指住橱窗外嘅佢哋咯，老实讲，做医生，都係呢种时刻最有成就感了。