【看更晚叔有嘢讲】　　　　唔知点解，呢排梗系觉得做人几化学，今日唔知听日事。好似旧年先授勋嗰个15楼嘅俞生，新年嗰时仲见到俞太大咗个肚，佢哋大女都返小学了，宜家又添咗个细路，係人都觉得係喜事嚟架。点知过年嗰时，俞生又入咗医院咧！今次就唔係佢对眼有事，係佢哋遇到爆炸添！咪就係嗰个主题公园咯，之前我粒孙都话要去了，好彩今年无去喈，大时大节居然发生乜爆炸。我都睇报纸电视，伤咗好多人喈，好彩差人去得快，拉咗班贼返嚟，但俞生就真係唔好彩，听讲係为护住佢哋嘅女，宜家仲瞓医院喈。早两日都係清明了，算下佢都喺医院住咗快两个月了。　　次次过年，俞生俞太不嬲都係返俞生屋企住过元宵先返，唔知今年係咪因为出咗呢次意外，加埋俞太仲操身大细，就一路冇返嚟住了，斋係俞太同工人返嚟摞咗几次信。睇俞太嘅样，唉，唔知点讲，睇佢同俞生由拍拖到宜家，假假地都好似睇自己嘅仔女咁样。俞太份人心底都几好，21楼嗰个张伯有心脏病，嗰次佢新抱同个仔返大陆倾生意，佢凑个孙返学韫lift喔，都係同lift嘅俞太帮佢急救先救返条命喈，后尾张生张太拎咗好多嘢去俞太屋企多谢佢，佢乜都唔收，就话乜邻里守护係应该嘅，刚啱咪15楼A嗰个伍小姐俾人投诉话音响开到太大声，阻住楼上小朋友温书，我先上到去喈，记返起嗰次自己当夜更都係好彩俞太，唔係嘅话，我都下去见我嗰个老太婆了。　　头先俞太同佢嘅工人又返咗嚟摞信，我咪问佢俞生点样，佢同我笑笑，话都係老样子，唉，睇佢虽然陀住个肚，但就得返个肚能俾人睇出係大肚婆喈，边有大肚婆咁大月份仲係咁瘦嘅，真係阴功咯。后尾佢哋咪上到去了，点知冇几耐俞太又急匆匆返落嚟，问我有冇睇到佢戒指。我睇佢手上戴住个戒指，咪问佢戒指唔係喺度。佢话佢戴嗰只係俞生嘅，佢自己嗰只太细戴唔落，咪挂喺颈链度，点知头先上到去，先发现戒指同条链都冇咗。佢话係结婚戒指，好紧要嘅，仲除咗自己手上嗰只俾我睇，我先发觉佢嘅手都有返大肚婆嘅样，肿肿嘅。讲返佢只戒指，我睇佢咁心急，咪帮只戒指影返相，话如果搵到，或者有人送嚟管理处，即刻打电话通知佢，佢攞攞乱咁点头，跟住又听到工人嗌佢，佢差啲连俞生嗰只戒指都唔记得摞就走咗去。跟住我咪喺一楼大堂四围搵咗一通，都未搵到俞太嗰只戒指同条链喈，唔知係咪俾人执咗去。　　后尾佢哋走嗰阵时，俞太就同我讲，话戒指搵到了。咁就好，睇佢咁着紧戒指，梗係着紧自己老公了。唉，希望俞生早日醒返了，点讲都算仔细老婆嫩，佢如果一路冇醒，睇怕俞太同肚里面嗰个，比起其他大肚婆同新生BB都要差一大截喈！　　　　今日系端午，喺屋企食咗lunch，我先嚟换更。啱啱巡完楼，坐定饮啖水，就撞返好耐无返嘅15楼嘅俞太了。算下佢都有个几月无返嚟了，佢抱住个bb带住大女和工人同我笑笑问好，又叫工人俾咗几个粽我，我话唔使客气喔，佢就话特登带嚟嘅，仲问我呢排身体好嘛，个孙点嘛。睇佢生咗个b，心情又几靓，我都唔好推辞咯，咪讲声多谢收咗啲粽，都系大酒楼嘅靓粽喈。睇佢精神都唔差，唔似之前返嚟咁攞攞乱，又唔多似赶时间，咪问佢个bb系男系女，佢大女就抢住答系妹妹喔！佢跟住话今日领个细女嚟认屋企门，晏啲先返嚟住。其实我唔知俞生宜家点样，大时大节如果佢未好返，我问咗咪等佢心酸，所以都冇问住，佢哋就话上返屋企先，佢嘅工人咪摞住艾草去按lift，佢又叫个大女去开信箱，佢大女踮脚摞咗啲信，跟住佢哋就企喺度等lift了。啱啱惗返起管理处话下周开业主大会，佢哋咁耐无返，唔知啲通知单会唔会俾保洁员琼姑扫走，我咪小跑上去提一提俞太咯，佢嗰时就喺度讲电话，睇我过去，对住话筒讲老公你等等，跟住问我有乜事。我咪讲咗业主大会嘅时间地点俾佢知，跟住问佢俞生系咪好返咗，佢就话我有心了，俞生好返好多了，不过仲要喺医院住多阵咯。咁就好咯，唔系嘅话，我都等佢哋惨喇！　　　　下礼拜就退休了，惗惗下喺度做咗廿几年都算係耐嘅了。头先新嚟嘅清洁员瑛姑就俾咗个银包我，话係喺后楼梯执到嘅。我戴住老花镜打开银包睇下，入面有张照片，原来係15楼俞生一家四口，就唔知银包係边个嘅了。睇呢个银包，棕色款又四四正正，我估都唔啱女仔用嘅，佢屋企除开俞太同两个女，得返俞生一个男仔，都可能係俞生嘅。　　咁啱15楼A嘅汤太买餸返嚟，嗌我上去收管理费，我咪摞只银包上去咯。收完管理费，我先按俞生屋企门钟，点知按极都冇人应，奇怪喈，大礼拜六咁早，照计佢哋嘅大女都从大学返屋企喇，又唔见俞生俞太出去跑步，冇理由冇人喺屋企嘅。管理处唔好太久冇人喺度，我咪摞只银包返去了。　　点知我落返去，啱啱出lift，就听到俞太话：“乜你咁大头虾嘅啊，我送你嘅银包都会唔见咗！”跟住听到俞生话：“我都唔想嘅啊，唔係琴晚lift坏咗，你又扭亲只脚，我都唔使孭你上去，都唔会唔见咗只银包咯！”跟住听到俞太话：“咁即係我嘅错了？”我行多两步先见到佢哋从楼梯间出嚟喔，佢哋见返我即刻问我有冇人执到俞生银包，我咪问係咪我手上嗰只，俞生一睇到即刻点头话係，接过去话多谢我喔。我咪讲唔使客气，係瑛姑喺后楼梯执返嘅，又问点解我头先按佢哋门钟都冇人应嘅，俞生就话佢同俞太头先喺后楼梯搵银包，两个女去咗camp，跟住咪拉住俞太等lift了。我行到管理处嗰边，仲听到俞生话，“呐，银包搵返喇，冇嬲我喇！阵间你返上去瞓多阵喇，我去煮嘢食，想食啲乜？”跟住18楼嘅黄生同朱小姐又跟我问好，我就冇留意俞生佢哋了。